O‘zbekiston Respublikasi Moliya vaziri buyrug‘i bilan mazkur vazirlik huzuridagi byudjetdan tashqari Pensiya jamg‘armasining “Pensiya, nafaqa va boshqa to‘lovlarni to‘lashni tashkil etish tartibi to‘g‘risida”gi yo‘riqnomasiga o‘zgartirishlar kiritildi, deb xabar beradi “Uzreport.uz”.
O‘zbekiston prezidentining 2015-yil 14-apreldagi “Keksalarni ijtimoiy himoya qilish va moddiy qo‘llab-quvvatlashni yanada kuchaytirish bo‘yicha qo‘shimcha chora-tadbirlar to‘g‘risida”gi Farmoni va yana bir qator Prezident va hukumat hujjatlariga muvofiq, ishlamaydigan shaxsga pensiya va nafaqa to‘lovi yo‘riqnomaga muvofiq shaxsning arizasiga asosan aniqlanadi.
Ishlamaydigan shaxslarga pensiya va nafaqalar ularning doimiy ro‘yxatdan o‘tgan joyi bo‘yicha to‘lanadi. Agarda shaxs faqat vaqtincha ro‘yxatdan o‘tgan bo‘lsa, pensiya va nafaqa vaqtinchalik ro‘yxatdan o‘tishning amal qiladigan muddati mobaynida to‘lanadi. O‘zbekistonda doimiy yashaydigan chet el fuqarosi yoki fuqaroligi bo‘lmagan shaxsga pensiya yashash guvohnomasi amal qiladigan muddat davomida to‘lanadi. Vaqtincha ro‘yxatdan o‘tishning yoki yashash uchun ruxsatnomaning amal qilish muddatining tugashi bilan uning keyingi sanasi o‘rtasida uzilish mavjud bo‘lgan taqdirda Pensiya jamg‘armasi bo‘limi tomonidan pensiyani to‘lash vaqtinchalik ro‘yxatdan o‘tishning yoki yashash uchun ruxsatnomaning yangi sanasidan boshlab davom ettiriladi. Bunda pensiyani to‘lash pensiya to‘lash to‘xtatilgan paytdan, biroq o‘n ikki oydan ortiq bo‘lmagan paytdan boshlab davom ettiriladi. Yo‘riqnomada belgilangan to‘lovni “eng kam ish haqining 18 foizi miqdorida oluvchilar” “eng kam ish haqining 25 foizi miqdorida oluvchilar” bilan almashtirildi.
Izoh (0)