AQShda respublikachilar homiylardan demokratlarga nisbatan ko‘proq pul olyapti

AQSh prezidenti saylovida respublikachilarni qo‘llab-quvvatlovchi mustaqil guruhlar hozirga qadar nomzodlarning saylovoldi fondi uchun 272,5 million dollar to‘plashga muvaffaq bo‘ldi. “Kommersant.ru”ning qayd etishicha, nomzodlarning o‘zi bor-yo‘g‘i 67,2 million dollar yig‘a olgan.

Demokratik partiya rasman Respublikachilardan ko‘p ham ortda qolmagan — 64,6 million dollar to‘plangan, biroq demokratlarni qo‘llab-quvvatlovchi mustaqil guruhlar hozirgi qadar faqat 15,9 million dollar yig‘a olgan.

Eng ko‘p mablag‘ni Jeb Bush yiqqan — uni qo‘llab-quvvatlovchi guruhga yirik homiylarning yarmi pul o‘tkazib bergan. Natijada u tashviqot ishlari natijasida 11,4 million, o‘zining badavlat tarafdorlari hisobidan esa 108,5 million dollar to‘plagan.

Respublikachilar partiyasidagi uning eng yaqin raqobatchisi, senator Ted Kruz esa mos ravishda 14,3 million va 37,8 million to‘plagan. Saylovnining haqiqiy sensatsiyasiga aylangan milliarder Donald Tramp esa 2 million dollardan kamroq pul olgan.

Demokratlar orasida esa pul to‘plash bo‘yicha AQShning sobiq davlat kotibi Hillari Klinton birinchi bo‘lib turibdi. Homiylardan tushgan pullarninng deyarli barchasi (15,6 million dollar) unga tegishli. Ayni vaqtda, tashviqot ishlarida Klinton xonim respublikachi-raqibi Jeb Bushga qaraganda yaxshiroq ishlamoqda: u Bushdan deyarli to‘rt baravar ko‘p — 47,1 million dollar to‘plagan.