Yangi Zelandiya Oliy sudi suv qa’riga cho‘kib borayotgan Kiribati davlati fuqarosiga boshpana berishni uzil-kesil rad etdi. Bu haqda The Daily Telegraph xabar bermoqda.
Sud Ioan Teitiota va uning oilasi milliy, diniy va boshqa jihatlardan ta’qib etilmayotganini isbotlab berdi hamda ularga qochoq maqomini berishdan bosh tortdi. Kiribati davlati muammolarga duch kelayotgan bo‘lsa-da, fuqarolarini himoya qilish uchun barcha choralar ko‘rayotganini ta’kidladi.
Oldinroq mamlakat sudlari bir necha marta Teitiotaning zarariga hukm chiqargan, biroq u apellyatsiya berib, hukm kuchga kirishini ortga surdirgan. Bu gal esa sud qarori yakuniy va hech qanday shikoyatga o‘rin yo‘q.
38 yoshli Ioan Teitiota besh kishidan iborat oilasi bilan Yangi Zelandiyaga 2007-yilda uch yillik viza bilan kelgan, ammo viza muddati tugagach, deportatsiya bo‘lishdan qochish uchun uni dunyoda birinchi iqlim muammolariga ko‘ra qochoq, deya tan olishlari to‘g‘risidagi iltimos bilan murojaat etgandi: u fuqarosi bo‘lgan Kiribati davlati asta-sekin suvga cho‘kib bormoqda.
Ma’lumot o‘rnida: Kiribati Respublikasi Gilbert, Layn va Feniks arxipelaglariga qarashli 32 orolda joylashgan. Suv sathining ko‘tarilishi oqibatida bu orollar suv ostida qolishi xavfi mavjud.
Izoh (0)