Янги Зеландия Олий суди сув қаърига чўкиб бораётган Кирибати давлати фуқаросига бошпана беришни узил-кесил рад этди. Бу ҳақда The Daily Telegraph хабар бермоқда.
Суд Иоан Теитиота ва унинг оиласи миллий, диний ва бошқа жиҳатлардан та’қиб этилмаётганини исботлаб берди ҳамда уларга қочоқ мақомини беришдан бош тортди. Кирибати давлати муаммоларга дуч келаётган бўлса-да, фуқароларини ҳимоя қилиш учун барча чоралар кўраётганини таъкидлади.
Олдинроқ мамлакат судлари бир неча марта Теитиотанинг зарарига ҳукм чиқарган, бироқ у апелляция бериб, ҳукм кучга киришини ортга сурдирган. Бу гал эса суд қарори якуний ва ҳеч қандай шикоятга ўрин йўқ.
38 ёшли Иоан Теитиота беш кишидан иборат оиласи билан Янги Зеландияга 2007 йилда уч йиллик виза билан келган, аммо виза муддати тугагач, депортация бўлишдан қочиш учун уни дунёда биринчи иқлим муаммоларига кўра қочоқ, дея тан олишлари тўғрисидаги илтимос билан мурожаат этганди: у фуқароси бўлган Кирибати давлати аста-секин сувга чўкиб бормоқда.
Маълумот ўрнида: Кирибати Республикаси Гильберт, Лайн ва Феникс архипелагларига қарашли 32 оролда жойлашган. Сув сатҳининг кўтарилиши оқибатида бу ороллар сув остида қолиши хавфи мавжуд.
Изоҳ (0)