Qozog‘istonlik 25 yoshli dasturchi Asxat Murzabayev jahondagi eng yirik bank guruhlaridani biri — Barclays’da yarim yil ishlab, 2 million dollar ishlab topdi. E’tiborli tomoni, “Tengrinews.kz”ning xabar berishicha, yosh mutaxassis barcha daromadini saratonga qarshi kurashga qaratilgan tadqiqotlar uchun beg‘araz taqdim etgan.
“Bir million ishlab topa olgan odamlar ikkinchi millionni ham ishlab topa oladi — men shunday deb hisoblayman. Biroq bu hayotdagi eng asosiy maqsad emas. Maqsad puldan-da yuqoriroq narsa bo‘lishi kerak”, — dedi Murzabayev.
Asxat hozirgi vaqtda iqtidorli qozog‘istonliklarni eng yaxshi kompaniyalarga ishga joylashtirish bilan shug‘ullanuvchi startap asoschilaridan biri hisoblanadi. Uning so‘zlariga ko‘ra, bu loyihadan ko‘zlangan maqsad — yuqori salohiyatli qozog‘istonliklarni bir joyda to‘plash va ularga mehnat bozoridagi eng yaxshi imkoniyatlarni taqdim etishdir.
Qayd etish joiz, Asxat o‘tgan yili Twitter kompaniyasida ishlagan edi. O‘shanda Esquire Kazakhstan jurnaliga bergan intervyusida u Google’ning ijrochi direktori bo‘lish orzusi borligini tan olgandi.
Izoh (0)