Қозоғистонлик 25 ёшли дастурчи Асхат Мурзабаев жаҳондаги энг йирик банк гуруҳларидани бири — Barclays’да ярим йил ишлаб, 2 миллион доллар ишлаб топди. Эътиборли томони, «Tengrinews.kz»нинг хабар беришича, ёш мутахассис барча даромадини саратонга қарши курашга қаратилган тадқиқотлар учун беғараз тақдим этган.
«Бир миллион ишлаб топа олган одамлар иккинчи миллионни ҳам ишлаб топа олади — мен шундай деб ҳисоблайман. Бироқ бу ҳаётдаги энг асосий мақсад эмас. Мақсад пулдан-да юқорироқ нарса бўлиши керак», — деди Мурзабаев.
Асхат ҳозирги вақтда иқтидорли қозоғистонликларни энг яхши компанияларга ишга жойлаштириш билан шуғулланувчи стартап асосчиларидан бири ҳисобланади. Унинг сўзларига кўра, бу лойиҳадан кўзланган мақсад — юқори салоҳиятли қозоғистонликларни бир жойда тўплаш ва уларга меҳнат бозоридаги энг яхши имкониятларни тақдим этишдир.
Қайд этиш жоиз, Асхат ўтган йили Twitter компаниясида ишлаган эди. Ўшанда Esquire Kazakhstan журналига берган интервьюсида у Google’нинг ижрочи директори бўлиш орзуси борлигини тан олганди.
Изоҳ (0)