8 июль куни «Ўзбектуризм» миллий компанияси биносида «Ўзбекистон» йўлкўрсаткичи электрон вариантининг намойиши бўлиб ўтди, деб хабар бермоқда «Ўзбектуризм» матбуот хизмати.
Йўлкўрсаткич «Рус гиди. Полиглот» нашр серияси доирасида Marakanda Expedition компаниясининг буюртмаси бўйича «Аякс-Пресс» билан ҳамкорликда нашр қилиниши режалаштирилмоқда ва асосан Россия сайёҳлари ва сайёҳлик компаниялари учун мўлжалланган.
Нашр тиражининг умумий миқдори 10 минг нусхада берилади. Ушбу маълумотнома 2015 йилнинг сентябрь ойида нашр қилиниши режалаштирилмоқда.
Охирги вақтларда Россиядан Ўзбекистонга ташриф буюраётган сайёҳларнинг сезиларли даражада ошиши Россия тур компаниялари ва агентликлари учун Ўзбекистон асосий сайёҳлик йўналишига айланганлигини ҳисобга олган ҳолда, йўлкўрсаткичнинг яратилиши Россия ва Ўзбекистон туризм бозори учун зарур ва долзарб жараён ҳисобланади.
Маълумотнома Россия китоб дўконлари, чакана савдо тармоқлари, супермаркет тармоқлари, халқаро аэропортларда жойлашган савдо масканларида, duty-free магазинларида, сайёҳлик агентликларида, интернет дўконларда ва китоб кўргазмаларида савдога чиқарилади.
140 саҳифадан иборат бўлган ушбу йўлкўрсаткич россиялик сайёҳларни Ўзбекистондаги сайёҳлик маршрутлари, кўзга кўринган жойлари, музейлари, меҳмонхоналари ва ресторанлари, айниқса мамлакат маданияти, аҳоли урф-одатлари ва анъаналари билан таништирувчи, шунингдек амалий маслаҳатлар берувчи манба сифатида нашр қилиниши кўзда тутилмоқда.
Йўлкўрсаткич 3 бўлимдан иборат бўлади.
«Саёҳатни режалаштириш» бўлимида россиялик саёҳатчилар Ўзбекистоннинг иқлими, сайёҳлик мавсумлари, транспорт тизими, фаол дам олишнинг турлари, болалар билан дам олиш имкониятлари ҳақида билиб олиш мумкин.
«Мамлакат ва аҳоли» бўлимида мамлакат табиати, маданияти ва дини тўғрисида қисқача маълумотлар бериб ўтилган. Шинингдек, миллий анъаналар, овқатлар ва ичимликлар, республиканинг байрамлари ва фестиваллари тўғрисида гапириб ўтилган.
«Ўзбекистон бўйича йўналишлар» бўлимида 9 та энг таниқли сайёҳлик маршрутлари бўйича маълумотлар берилиб, уларда асосан Самарқанд, Бухоро, Хива каби қадимий шаҳарлар, Тошкентнинг тоғ ёнбағирларида жойлашган курортлар, Шимолий ва Жанубий Ўзбекистон (Нукус, Қашқадарё, Сурхондарё), Фарғона водийси, Зомин ва Айдаркўл масканлари бўйича тўлиқ маълумотлар берилган.
Шунингдек, йўлкўрсаткичга Ўзбекистон ва Тошкентнинг флип-харитаси илова қилинган. Намойишда иштирок этган кўзга кўринган олимлар, сиёсатчилар ва журналистлар йўлкўрсаткичнинг асосий мазмун-моҳияти, тузилиши, дизайни тўғрисида умумий фикрларини билдириб, ушбу қўлланма нафақат Россия саёҳатчиларига, балки бошқа мамлакатлардан ташриф буюраётган саёҳатчилар учун ҳам асосий қўлланма бўла олишини таъкидлади.
Изоҳ (0)