29-iyunda Toshkentdagi jazirama rekordiga 2,2 daraja yetmadi

29-iyun kuni Toshkentda Selsiy shkalasi bo‘yicha havo harorati 38,8 darajani ko‘rsatdi.

Ba’zi bir OAVlari 29-iyun kuni uchun havo harorati 1902-yildagi mutlaq rekordni yangilagani haqida xabar berdi. “Daryo” tahririyati O‘zbekiston Gidrometeorologiya xizmati bilan bog‘landi va ushbu masalaga oydinlik kiritdi.

Gidrometeorologiya xizmati markazi xodimlarining “Daryo”ga bergan xabariga ko‘ra, 1902-yil 29-iyun kuni havo harorati +41 darajani tashkil qilgan va 2015-yil 29-iyun kungi harorat mutlaq rekordga 2,2 daraja yetmagan.

Oldinroq O‘zbekistonda havo hafta oxirigacha yuqori bo‘lishini ma’lum qilgandik. Jazirama rekordi ushbu haftada yangilanishi ham mumkin.