O‘zbekiston pillakorlari 26 ming tonnadan ziyod pilla tayyorlab, yillik shartnoma majburiyatini ado etdi, deb xabar beradi “O‘zA”.
O‘zbekiston Qishloq va suv xo‘jaligi vazirligidan ma’lum qilishlaricha, bu yil o‘zbekistonlik pillakorlar “Ipakchi-1”, “Ipakchi-2”, “O‘zbekiston-5”, “O‘zbekiston-6” kabi serhosil, iqlim sharoitimizga mos, kasalliklarga chidamli mahalliy navlardan iborat 454 ming 600 qutidan ziyod ipak qurti urug‘i parvarishlab, har qutidan o‘rtacha 57,6 kilogrammdan hosil oldi.
Samarqand, Qashqadaryo, Surxondaryo, Buxoro, Farg‘ona, Namangan, Navoiy viloyatlari pillakorlari birinchilar qatorida pilla yetishtirish bo‘yicha shartnomaviy rejani oshirib bajardi. Kattaqo‘rg‘on, Kasbi, Jarqo‘rg‘on, Qorako‘l, Beshariq, Norin, Xatirchi tumanlarida har quti ipak qurtidan 60—67 kilogrammdan hosil olishga erishildi.
Joriy yilda “O‘zpaxtasanoat” uyushmasi tizimidagi paxta qabul qilish punktlari qoshida tashkil etilgan 196 ixtisoslashgan pillaxonada ham 22 ming 700 quti ipak qurti boqildi.
Pilla qabul qilish punktlarida ish qizg‘in bormoqda. Keyingi yil pilla hosiliga tayyorgarlik ko‘rish, mavjud tutzorlarga ishlov berish, ularni zararkunandalardan asrash ishlari ham davom etmoqda.
Izoh (0)