O‘zbekning nimasi ko‘p — to‘yi ko‘p; hovli to‘yi, beshikto‘yi, xatna (sunnat) to‘yi, nikoh to‘yi va hokazo. Afsuski, ayrim to‘y-hasham, marosim va ma’rakalardagi xarajatlar cho‘ntak ko‘tarmas darajaga yetib bormoqda, deb yozadi “Inson va qonun” gazetasi.
“Aslida har qaysi ma’raka va marosim milliylikdan darak beradi. Ammo oramizda kim o‘zarga to‘y o‘tkazib, undan keyin qarzga yashashga majbur bo‘layotganlar ham topiladi.
Bugun to‘qchilik, borchilik, hech bo‘lmaganda, chiranish bilan o‘tayotgan nikoh bazmlarida, iloji bo‘lsa, ko‘z ko‘rmagan narsalarni dasturxonga qo‘yib, quloq eshitmagan amallarni qilishdan maqsad — shu yo‘l bilan obro‘—e’tibor topish, odamlarni hayratga solish.
Birgina nikoh to‘yi shuncha daxmazaga aylangani kamdek, uning yoniga ‘qizlar bazmi’, ‘kelin chaqiriq’, ‘kuyov chaqiriq’, ‘quda-anda chaqiriq’, ‘chorlar’, ‘asal oyi’, ‘yo‘qlov’ kabilar ham qo‘shilgan. Bularning bari hayot mazmunini tog‘aralar ko‘tarishdan iborat, deb biladigan besh-oltita g‘irt bekorchi xotinlar tomonidan o‘ylab topilgan va ularning har biri bitta to‘yning xarajatiga yaqinlashib qoladi”, — deb hisoblaydi tadqiqotchi Mirislom Badalov.
Izoh (0)