O‘zbekiston Futbol Federatsiyasining Ijroiya Qo‘mitasi navbatdagi majlisi O‘zbekiston milliy terma jamoasining oxirgi o‘yinlari va jahon chempionati saralash bahslarini mag‘lubiyat bilan boshlagani, shuningdek, olimpiya terma jamoasining 23 yoshgacha bo‘lgan futbolchilar o‘rtasidagi Osiyo chempionati saralash o‘yinlarini o‘ta muvaffaqiyatsiz o‘tkazganligi to‘g‘risidagi masalalarga bag‘ishlandi. Bu haqda O‘zbekiston futbol federatsiyasi matbuot xizmati xabar bermoqda.
Majlisga O‘zbekiston Futbol Federatsiyasi prezidenti Mirabror Usmonov raislik qildi. Usmonov kun tartibidagi masalalar haqida gapirarkan, O‘zbekistonda hukumat yaratib berayotgan sharoitlarda unumli foydalanish kerakligini alohida ta’kidladi.
“Bugun futbol O‘zbekistonda nafaqat stadionda, balki mamlakatimizning har bir chekkasida mavjud. Yoshlar futbol o‘ynayapti. Yangi futbol maktablari qurilmoqda. Unda yangi iste’dodlar kashf qilinyapti. Bir so‘z bilan aytganda, futbolda oliy maqsadlarni ko‘zlash uchun bugun eng yaxshi sharoit va qulayliklar tayyorlab berildi”, - deya gapirdi Mirabror Usmonov.
Federatsiya prezidentining so‘zlariga ko‘ra, sharoitlar yaratib berildimi, ularning mevasini ham talab qilish vaqti allaqachon yetganligini ham alohida urg‘uladi.
“Ming afsuski, yaratib berilgan sharoitlarga yarasha natijalar bo‘lmayapti. Olimpiya terma jamoasini olaylik. Ularning Osiyo chempionatiga zo‘rg‘a chiqqanligini biz faqat va faqat omadga yo‘yishimiz kerak. Biz kuchimiz bilan chiqmadik, bizga faqat omad kulib boqdi. Sharmandagarchilikdan qanday qutulib qolganimizni butun Osiyo ko‘rdi. Bunda federatsiyadagi hamma aybdor!”, — dedi Usmonov.
Eslatib o‘tamiz, Baxtiyor Ashurmatov bosh murabbiyligidagi O‘zbekiston olimpiya terma jamoasi Bangladeshda bo‘lib o‘tgan Osiyo Chempionati saralash bahslarida Suriya, Hindiston va Bangladesh olimpiya terma jamoalariga qarshi bahs olib borgan va ushbu guruhda 6 ochko bilan ikkinchi o‘rinni qo‘lga kiritgan edi. O‘zbekiston olimpiya termasi barcha guruhlarda eng yaxshi natijaga erishgan 5 ta ikkinchi o‘rinni qayd etgan jamoalar orasiga kirgani uchungina OCh final bosqichiga yo‘l olgandi.
Olimpiya termasining natijalari qoniqarsiz baholandi va Baxtiyor Ashurmatov ishdan olinib, uning o‘rniga Viktor Jalilov tayinlandi. Olimpiya terma jamoasi oldiga 2016-yilgi Olimpiada o‘yinlariga chiqish vazifasi yuklatildi.
Izoh (0)