Ўзбекистон Футбол Федерациясининг Ижроия Қўмитаси навбатдаги мажлиси Ўзбекистон миллий терма жамоасининг охирги ўйинлари ва жаҳон чемпионати саралаш баҳсларини мағлубият билан бошлагани, шунингдек, олимпия терма жамоасининг 23 ёшгача бўлган футболчилар ўртасидаги Осиё чемпионати саралаш ўйинларини ўта муваффақиятсиз ўтказганлиги тўғрисидаги масалаларга бағишланди. Бу ҳақда Ўзбекистон футбол федерацияси матбуот хизмати хабар бермоқда.
Мажлисга Ўзбекистон Футбол Федерацияси президенти Мираброр Усмонов раислик қилди. Усмонов кун тартибидаги масалалар ҳақида гапираркан, Ўзбекистонда ҳукумат яратиб бераётган шароитларда унумли фойдаланиш кераклигини алоҳида таъкидлади.
«Бугун футбол Ўзбекистонда нафақат стадионда, балки мамлакатимизнинг ҳар бир чеккасида мавжуд. Ёшлар футбол ўйнаяпти. Янги футбол мактаблари қурилмоқда. Унда янги истеъдодлар кашф қилиняпти. Бир сўз билан айтганда, футболда олий мақсадларни кўзлаш учун бугун энг яхши шароит ва қулайликлар тайёрлаб берилди», - дея гапирди Мираброр Усмонов.
Федерация президентининг сўзларига кўра, шароитлар яратиб берилдими, уларнинг мевасини ҳам талаб қилиш вақти аллақачон етганлигини ҳам алоҳида урғулади.
«Минг афсуски, яратиб берилган шароитларга яраша натижалар бўлмаяпти. Олимпия терма жамоасини олайлик. Уларнинг Осиё чемпионатига зўрға чиққанлигини биз фақат ва фақат омадга йўйишимиз керак. Биз кучимиз билан чиқмадик, бизга фақат омад кулиб боқди. Шармандагарчиликдан қандай қутулиб қолганимизни бутун Осиё кўрди. Бунда федерациядаги ҳамма айбдор!», — деди Усмонов.
Эслатиб ўтамиз, Бахтиёр Ашурматов бош мураббийлигидаги Ўзбекистон олимпия терма жамоаси Бангладешда бўлиб ўтган Осиё Чемпионати саралаш баҳсларида Сурия, Ҳиндистон ва Бангладеш олимпия терма жамоаларига қарши баҳс олиб борган ва ушбу гуруҳда 6 очко билан иккинчи ўринни қўлга киритган эди. Ўзбекистон олимпия термаси барча гуруҳларда энг яхши натижага эришган 5 та иккинчи ўринни қайд этган жамоалар орасига киргани учунгина ОЧ финал босқичига йўл олганди.
Олимпия термасининг натижалари қониқарсиз баҳоланди ва Бахтиёр Ашурматов ишдан олиниб, унинг ўрнига Виктор Жалилов тайинланди. Олимпия терма жамоаси олдига 2016 йилги Олимпиада ўйинларига чиқиш вазифаси юклатилди.
Изоҳ (0)