Xalq ta’limi vazirligi “O‘quvchilarni sinfdan sinfga va bir umumiy o‘rta ta’lim muassasasidan boshqasiga o‘tkazish tartibi to‘g‘risidagi nizomni tasdiqlash haqida” buyruq qabul qildi. Bu haqda “Uzreport.uz” nashriga tayanib, “UZ24” xabar qilmoqda.
Ushbu qarorda qayd etilgan talablar O‘zbekiston Respublikasi fuqarolari va istiqomat qilayotgan fuqaroligi bo‘lmagan shaxslarni sinfdan sinfga va bir maktabdan boshqasiga o‘tkazishga nisbatan tadbiq etiladi.
Mazkur Nizom jismoniy yoki psixik rivojlanishida nuqsoni bo‘lgan o‘quvchilarni sinfdan sinfga va bir maktabdan boshqasiga o‘tkazishga nisbatan tatbiq etilmaydi.
Maktab o‘quvchilarini sinfdan sinfga va bir maktabdan boshqasiga o‘tkazish masalalari umumiy o‘rta ta’limning majburiyligi hamda O‘zbekiston Respublikasida istiqomat qiluvchi shaxslarning ta’lim olish tilini erkin tanlash huquqini inobatga olgan holda amalga oshiriladi. Bu jarayon bepul amalga oshiriladi.
O‘quvchining ota-onasi yoki ularning o‘rnini bosuvchi shaxslar o‘z xohishiga ko‘ra o‘quv yili davomida yoki u tugaganidan so‘ng farzandini sinfdan sinfga o‘tkazish huquqiga ega. Ota-onalar farzandini sinfdan sinfga o‘tkazish uchun uning sabablarini ko‘rsatgan holda maktab direktori nomiga ariza bilan murojaat qiladi.
Maktab direktori arizani qabul qilib olgan kundan boshlab bir ish kuni ichida ko‘rib chiqadi va o‘quvchini sinfdan sinfga o‘tkazish to‘g‘risida buyruq qabul qiladi. Bunda sinfdagi o‘quvchilar soni belgilangan me’yordan ortiq bo‘lgan taqdirda, maktab direktori o‘quvchini sinfdan sinfga o‘tkazishni rad qilishi mumkin.
Xuddi shunday talablar o‘quvchini bir maktabdan boshqasiga o‘tkazishda ham tadbiq etiladi. Bunda o‘qishni davom ettirish uchun tanlangan maktab direktori boshqa maktabdan o‘tkazilayotgan o‘quvchining o‘quv jarayonlaridan chetda qolib ketmasligini ta’minlash uchun barcha zarur choralarni ko‘rishi shart.
Izoh (0)