AQShning Charlston shahridagi cherkovda to‘qqiz nafar afro-amerikalikni otib tashlagan Dilan Rufning murojaatnomasi internetdan topildi, deya xabar bermoqda “Exo Moskvi”.
Matn 21 yoshli oq tanli amerikalikning irqchilik, natsizm va qora tanlilarga nisbatan nafrat g‘oyalariga mukkasidan ketganini ko‘rsatadi.
Amerika adliya vazirligi ushbu jinoyatni terrorchilik harakati deb atamoqda, ammo FQB vakillari bunday fikrni ma’qullamayapti.
Charlston cherkovidagi fojia 17-iyun, chorshanba kuni sodir bo‘ldi. Asosan afro-amerikaliklar qatnaydigan cherkov tashrifchilariga 21 yoshdagi oq tanli yigit o‘q uzgan. Natijada olti nafar ayol va uch erkak halok bo‘ldi. Ular orasida cherkov ruhoniysi va Janubiy Karolina shtati qonunchilik kengashi senatori Klement Pinkni ham bor edi.
Eslatib o‘tamiz, avvalroq cherkovda o‘ldirilgan to‘qqiz kishidan ba’zilarining qarindoshlari o‘q ochgan 21 yoshli Dilan Ruf bilan uchrashgan va uni kechirishlarini aytgan edi.
Izoh (0)