Amerikalik rassom va fotosuratchi Mark Gubin aeroport yaqinida joylashgan studiyasi tomiga ulkan harflar bilan “Klivlendga xush kelibsiz” deb yozib qo‘ydi, deya xabar bermoqda Meduza.
Hazil shundan iboratki, studiya Klivlenddan bir necha yuz kilometr g‘arbdagi Miluoki shahri (Viskonsin shtati)da joylashgan.
Tomdagi yozuv 1978-yildayoq paydo bo‘lgan, o‘shandan buyon u haqda minglab gazeta va jurnallar yozdi, uni bugungi kunda ham esga olishadi.
Rassom nashrlardan biriga bergan intervyusida bunday yozuv tushirish g‘oyasi tomda yordamchisi bilan ovqatlanib o‘tirganida paydo bo‘lganini aytgan edi.
Yordamchisi pastlab uchayotgan samolyotlarni ko‘rib, “Miluokiga marhamat” ma’nosidagi belgi tushirishni taklif qilgan. Gubin esa “Bilasanmi, qanaqa yozuv undanam yaxshiroq bo‘lar edi?” — degan va hazilona qilmishini amalga oshirgan.
Shahar hukumati, aeroport vakillari yoki aviakompaniyalar tomonidan Gubinga shikoyat kelib tushmagan.
Nashr aniqlik kiritishicha, Denverdan Klivlendga uchadigan reys Miluokida to‘xtab o‘tgan. Gubinning yozuvi esa yo‘lovchilarni chalg‘itib, samolyot to‘xtamay uchgan deb o‘ylashga majbur qilgan.
Izoh (0)