Toshkent shahrida istiqomat qiluvchi 35 yoshli Farhod Ortiqboyev autizmdan aziyat chekayotgan 10 yoshli o‘g‘li – Muhammad Ali uchun noodatiy futbolka o‘ylab topdi. Bu haqda mapa.uz xabar bermoqda.

Foto: mapa.uz

Foto: mapa.uz

Farhodning o‘g‘li gapira olmaydi va odamlarga qaramaydi, shu sababli ham uning futbolkasi old va orqa tarafiga, ikki tilda: “agar uni yolg‘iz ko‘rib qolsangiz, ushbu raqamga qo‘ng‘iroq qilib, xabar bering”, qabilidagi yozuvni tushirish eng yaxshi yechim bo‘ldi.

Yaqinda Ali yo‘qolib qoldi va sal qolsa mashina ostida qolishi mumkin edi. Biroq ziyrak haydovchilardan birining yordami bilan u omon qoldi – haydovchi bolani mashinaga o‘tqazib, ota-onasi yo yaqinlari kelgunicha u bilan birga bo‘lgan.

Farhod Ortiqboyevning so‘zlariga ko‘ra, ismi mashhur bokschi sharafiga qo‘yilgan 10 yoshli o‘g‘li rasman “noodatiy autizm” tashxisi qo‘yilgan O‘zbekistondagi ilk bola bo‘lgan.

“Bizda odamlar o‘ziga xos bolalar haqida gapirishga odatlanmagan. Vaziyat endi o‘zgarmoqda. Ikki oy avval “Farishtacha” klubini tashkil qildim, bu yerda turli o‘ziga xoslikka ega bolalarning ota-onalari to‘planadi. O‘nga yaqin odam muntazam yig‘iladi”, - dedi Farhod.

Farhod o‘zi uchun ham yozuvli futbolka tayyorlattirdi. Unga shunday yozilgan: “Mag‘rur o‘g‘ilning mag‘rur otasi”.