Тошкент шаҳрида истиқомат қилувчи 35 ёшли Фарҳод Ортиқбоев аутизмдан азият чекаётган 10 ёшли ўғли – Муҳаммад Али учун ноодатий футболка ўйлаб топди. Бу ҳақда mapa.uz хабар бермоқда.
Фарҳоднинг ўғли гапира олмайди ва одамларга қарамайди, шу сабабли ҳам унинг футболкаси олд ва орқа тарафига, икки тилда: «агар уни ёлғиз кўриб қолсангиз, ушбу рақамга қўнғироқ қилиб, хабар беринг», қабилидаги ёзувни тушириш энг яхши ечим бўлди.
Яқинда Али йўқолиб қолди ва сал қолса машина остида қолиши мумкин эди. Бироқ зийрак ҳайдовчилардан бирининг ёрдами билан у омон қолди – ҳайдовчи болани машинага ўтқазиб, ота-онаси ё яқинлари келгунича у билан бирга бўлган.
Фарҳод Ортиқбоевнинг сўзларига кўра, исми машҳур боксчи шарафига қўйилган 10 ёшли ўғли расман «ноодатий аутизм» ташхиси қўйилган Ўзбекистондаги илк бола бўлган.
«Бизда одамлар ўзига хос болалар ҳақида гапиришга одатланмаган. Вазият энди ўзгармоқда. Икки ой аввал «Фариштача» клубини ташкил қилдим, бу ерда турли ўзига хосликка эга болаларнинг ота-оналари тўпланади. Ўнга яқин одам мунтазам йиғилади», - деди Фарҳод.
Фарҳод ўзи учун ҳам ёзувли футболка тайёрлаттирди. Унга шундай ёзилган: «Мағрур ўғилнинг мағрур отаси».
Изоҳ (0)