O‘zbekiston terma jamoasining Eron bilan o‘rtoqlik uchrashuvini o‘zbekistonlik FIFA hakamlari boshqarib boradi, deya xabar bermoqda O‘zbekiston Futbol federatsiyasi matbuot xizmati. Bosh hakam — Vladislav Seytlin. Qanot hakamlari — Husniddin Shodmonov va Ruslan Samandarov. Yordamchi hakam — Murod Muhamedov.
“Bunyodkor” stadionida 11-iyun kuni soat 18:00 da boshlanadigan Eron terma jamoasiga qarshi o‘yin “Sport” telekanali orqali jonli efirda namoyish etiladi.
Chiptalar “Bunyodkor” stadioni kassalarida sotilmoqda. SIP toifadagi chiptalar narxi — 30 000, qolgan barcha chiptalar 13 000 so‘mdan.
O‘zbekiston milliy terma jamoasi Toshkentdagi yig‘inini davom ettirmoqda. 9-iyun kuni jamoa “Jar” stadionida o‘zining ikkinchi mashg‘ulotlarini o‘tkazdi. Ayni vaqtda terma jamoaga jalb etilgan futbolchilardan faqatgina Server Jeparov jarohati tufayli mashg‘ulotlarda ishtirok eta olmayapti. Qolgan barcha futbolchilar 11-iyun, payshanba kuni Eronga qarshi bo‘lib o‘tadigan o‘rtoqlik uchrashuvi hamda 16-iyun kuni Shimoliy Koreyaga qarshi safarda bo‘ladigan Jahon chempionati saralashi doirasidagi o‘yinga tayyorgarlik ko‘rmoqda.
Ta’kidlash kerakki, terma jamoa safida ushbu o‘yinda “Lokomotiv” yarim himoyachisi Ikrom Aliboyev o‘zining debyut uchrashuvini o‘tkazishi mumkin. U ilk bor mamlakatning bosh jamoasi yig‘inlariga taklif etilgan.
Izoh (0)