Ўзбекистон терма жамоасининг Эрон билан ўртоқлик учрашувини ўзбекистонлик ФИФА ҳакамлари бошқариб боради, дея хабар бермоқда Ўзбекистон Футбол федерацияси матбуот хизмати. Бош ҳакам — Владислав Сейтлин. Қанот ҳакамлари — Ҳусниддин Шодмонов ва Руслан Самандаров. Ёрдамчи ҳакам — Мурод Муҳамедов.
«Бунёдкор» стадионида 11 июнь куни соат 18:00 да бошланадиган Эрон терма жамоасига қарши ўйин «Спорт» телеканали орқали жонли эфирда намойиш этилади.
Чипталар «Бунёдкор» стадиони кассаларида сотилмоқда. SIP тоифадаги чипталар нархи — 30 000, қолган барча чипталар 13 000 сўмдан.
Ўзбекистон миллий терма жамоаси Тошкентдаги йиғинини давом эттирмоқда. 9 июнь куни жамоа «Жар» стадионида ўзининг иккинчи машғулотларини ўтказди. Айни вақтда терма жамоага жалб этилган футболчилардан фақатгина Сервер Жепаров жароҳати туфайли машғулотларда иштирок эта олмаяпти. Қолган барча футболчилар 11 июнь, пайшанба куни Эронга қарши бўлиб ўтадиган ўртоқлик учрашуви ҳамда 16 июнь куни Шимолий Кореяга қарши сафарда бўладиган Жаҳон чемпионати саралаши доирасидаги ўйинга тайёргарлик кўрмоқда.
Таъкидлаш керакки, терма жамоа сафида ушбу ўйинда «Локомотив» ярим ҳимоячиси Икром Алибоев ўзининг дебют учрашувини ўтказиши мумкин. У илк бор мамлакатнинг бош жамоаси йиғинларига таклиф этилган.
Изоҳ (0)