Jahon banki vakillaridan iborat guruh “Janubiy Qoraqalpog‘istonda suv resurslari boshqaruvini yaxshilash” loyihasiga kiritilgan hududlar bilan tanishish uchun Qoraqalpog‘istonning Beruniy tumaniga tashrif buyurdi, deya xabar bermoqda Telegraf.uz.
Mazkur loyiha 2016-2021-yillar davomida Butunjahon banki kreditlari va O‘zbekiston hukumatining mablag‘lari evaziga amalga oshiriladi. Loyihaning umumiy qiymati 376,7 million AQSH dollarini tashkil etadi.
Loyiha doirasida Beruniy, To‘rtko‘l va Ellikqal’a tumanlarida suv ta’minotini yaxshilash maqsadida, uzunligi 70 kilometrga, o‘tkazish imkoniyati esa soniyasiga 105 kub metr suvga teng “Bo‘ston” betonli magistral kanalini qurish, uzunligi 31,1 kilometr, o‘tkazish imkoniyati soniyasiga 160 kub metr suv bo‘lgan Tuyamo‘yin magistral kanalini, uzunligi 27,5 kilometrga teng “Paxta-arna” magistral kanalini, 375-kilometrli xo‘jaliklararo kanallarni rekonstruksiya qilish va ularning gidrotexnik inshootlarini ta’mirlash ko‘zda tutilgan.
Natijada, 100 ming ga sug‘oriladigan yerlarda suv resurslarini boshqarish yaxshilanib, ularning foydali ish koeffitsiyenti ko‘tariladi, Tuyamo‘yin suv omborlaridan mazkur hududlarga mustaqil oqadigan suv uzatish imkoni paydo bo‘ladi. Shuningdek, fermer xo‘jaliklari va suv iste’molchilari uyushmalarining 544 dona nasos agregatlari ishlari to‘xtatilishi hisobiga har yili 14,5 milliard so‘m mablag‘ iqtisod qilinadi.
Bundan tashqari, loyihada paxta terish kombaynlarini xarid qilish va paxta tozalash zavodlariga yetkazib berish ham nazarda tutilgan bo‘lib, paxta terimini mexanizatsiyalashtirish hisobiga zavodlardagi ishlab chiqarish xarajatlari kamayadi. Umuman olganda, loyihani amalga oshirish natijasida ekin dalalarining hosildorligi ortib, xarajatlar qisqaradi.
Izoh (0)