Берлускони адашиб сиёсий рақиби фойдасига ташвиқот қилди

Италия собиқ бош вазири, ўнг-марказчи «Олға, Италия» партияси етакчиси Силвио Берлускони хатолик сабаб маҳаллий сайловлардаги сиёсий рақибларининг номзодини қўллаб, нутқ сўзлади. "TASS"нинг хабар беришича, ҳодиса Милан яқинидаги Сеграта шаҳрида юз берган.

Сўл-марказчи рўйхатдан шаҳар мерлигига номзод Паоло Микелининг сўзларига кўра, Берлусконининг кортежи Микелини қўллаб-қувватлаш учун ёшлар учун намойиш этилган майдонга келган. Собиқ бош вазир машинадан тушиб, майдондаги стендлар билан танишган ва бир қатор ёшлар билан сўзлашиб, улар қўллаётган номзоднинг исмини сўраган. «Паоло Микели» деган жавобни олиб, Берлускони ёшларга «якшанба куни бир соат вақт топиб, Паолога овоз беришга» чақирган. Кўп ўтмай, гувоҳларнинг сўзларига кўра, сиёсатчининг ёрдамчилари хато бўлганини тушуниб етишган – «Олға, Италия» партияси томонидан қўллаб-қувватланган номзод аёл киши бўлиб, Текла Фраскини бошқа майдонда учрашув ўтказаётган эди.

Шаҳарнинг амалдаги мери Адриано Алессандринининг сўзларига кўра, 35 мингга яқин аҳоли яшайдиган шаҳар учун Берлусконининг ўзи келгани ҳам катта гап. Собиқ бош вазир ўз партиясига етакчилик қилишда ва маҳаллий сайловларда партиядан номзодларни қўллаб-қувватлашда фаол иштирок этмоқда.