Toshkentdagi Poytaxt biznes markazida 28 may kuni “Blogerlar chempionati”ning yakuni bo‘yicha g‘oliblarni taqdirlash marosimi bo‘lib o‘tdi. Bu haqda Telegraf.uz xabar bermoqda.
Chempionat yakunlariga ko‘ra, Maqsudxon Salomov birinchi, Aziz Qarshiyev ikkinchi, Nosirjon Azizov esa uchinchi o‘rinni qo‘lga kiritdi. Ularga O‘zbekiston mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondi tomonidan mos ravishda 4, 2, 1 million so‘m miqdoridagi pul mukofotlari topshirildi.
Голиблар. #uzbloger2015 pic.twitter.com/3nHDgKGehX
— Azamat Abdullaev (@abdullaevazamat) May 28, 2015
Bundan tashqari, “Vatanparvarlik mavzusida yozilgan eng yaxshi ish” (Otabek Yo‘ldoshev), “O‘zbekistonda yoshlar hayotini yoritgan eng yaxshi bloger” (Sanjar Rustamov), “Ijtimoiy muammolarni noodatiy tarzda yoritgan bloger” (Akrom Malikov), “Sog‘lom turmush tarzini targ‘ib qilgan eng yaxshi bloger” (Davron Fayziyev), “O‘z ishlarida o‘zbek tilining imlo qoidalariga amal qilgan eng yaxshi bloger” (Iqboljon Yusupov) nominatsiyalari bo‘yicha ham g‘oliblar taqdirlandi.
Shuningdek, UzInfoCom markazi tomonidan finalga yo‘l olgan barcha 10 nafar blogerlarga 2 yil muddatga bepul xosting ajratiladi. Bunda 1-3 o‘rinlarni olgan blogerlarga 1 gigabayt hajmdagi, qolgan 7 nafar finalchilarga esa 250 megabayt hajmdagi xosting taqdim etiladi.
Ma’lumot uchun, bu yilgi “Blogerlar chempionati”da jami 266 nafar bloger ishtirok etdi hamda 319 ta blogpost yozildi.
Chempionat uchun maxsus ishga tushirilgan saytni ikki oy davomida 10 minga yaqin foydalanuvchi kuzatib bordi. O‘tgan davr mobaynida saytga taqdim etilgan barcha ijodiy ishlar 270 ming martadan ko‘proq o‘qib chiqildi, mushtariylar tomonidan ikki oy davomida saytda 3430 ta izoh (comment) qoldirildi.
Mazkur tanlovda blogerlar istalgan ko‘rinishda blogpost yozishi mumkin bo‘ldi. Blogpost hajmi cheklanmadi. Blogpost shakliga (matn, foto, video, audio va boshqa) ham cheklov bo‘lmadi. Chempionat uchun taqdim etilayotgan materiallar blogerning o‘z uslubiga va kreativligiga havola qilindi.
Izoh (0)