Тошкентдаги Пойтахт бизнес марказида 28 май куни «Блогерлар чемпионати»нинг якуни бўйича ғолибларни тақдирлаш маросими бўлиб ўтди. Бу ҳақда Telegraf.uz хабар бермоқда.
Чемпионат якунларига кўра, Мақсудхон Саломов биринчи, Азиз Қаршиев иккинчи, Носиржон Азизов эса учинчи ўринни қўлга киритди. Уларга Ўзбекистон мустақил босма оммавий ахборот воситалари ва ахборот агентликларини қўллаб-қувватлаш ва ривожлантириш жамоат фонди томонидан мос равишда 4, 2, 1 миллион сўм миқдоридаги пул мукофотлари топширилди.
https://twitter.com/abdullaevazamat/status/603906581118353408
Бундан ташқари, «Ватанпарварлик мавзусида ёзилган энг яхши иш» (Отабек Йўлдошев), «Ўзбекистонда ёшлар ҳаётини ёритган энг яхши блогер» (Санжар Рустамов), «Ижтимоий муаммоларни ноодатий тарзда ёритган блогер» (Акром Маликов), «Соғлом турмуш тарзини тарғиб қилган энг яхши блогер» (Даврон Файзиев), «Ўз ишларида ўзбек тилининг имло қоидаларига амал қилган энг яхши блогер» (Иқболжон Юсупов) номинациялари бўйича ҳам ғолиблар тақдирланди.
Шунингдек, UzInfoCom маркази томонидан финалга йўл олган барча 10 нафар блогерларга 2 йил муддатга бепул хостинг ажратилади. Бунда 1-3 ўринларни олган блогерларга 1 гигабайт ҳажмдаги, қолган 7 нафар финалчиларга эса 250 мегабайт ҳажмдаги хостинг тақдим этилади.
Маълумот учун, бу йилги «Блогерлар чемпионати»да жами 266 нафар блогер иштирок этди ҳамда 319 та блогпост ёзилди.
Чемпионат учун махсус ишга туширилган сайтни икки ой давомида 10 минга яқин фойдаланувчи кузатиб борди. Ўтган давр мобайнида сайтга тақдим этилган барча ижодий ишлар 270 минг мартадан кўпроқ ўқиб чиқилди, муштарийлар томонидан икки ой давомида сайтда 3430 та изоҳ (comment) қолдирилди.
Мазкур танловда блогерлар исталган кўринишда блогпост ёзиши мумкин бўлди. Блогпост ҳажми чекланмади. Блогпост шаклига (матн, фото, видео, аудио ва бошқа) ҳам чеклов бўлмади. Чемпионат учун тақдим этилаётган материаллар блогернинг ўз услубига ва креативлигига ҳавола қилинди.
Изоҳ (0)