Ўзини Тожикистон президентининг ўғли деб кўрсатган Душанбедаги халқаро мактабнинг 10-синф ўқувчиси ҳибсдан озод этилди ва мактабига қайтиб улгурди. Бу ҳақда Asia-Plus нашри хабар бермоқда.
Коррупцияга қарши кураш ва молиявий назорат бўйича агентлик маълум қилишича, 16 ёшли Хушдил Қурбонов 50 минг доллар миқдоридаги зарарни қоплагач, «одатий ҳаёт тарзига қайтди, яъни мактабга қатнай бошлади».
Манба хабарига кўра, Қурбонов вояга етмаганлиги, шунингдек ўз айбини тўлиқ тан олганлиги сабабли жиноий жавобгарликдан озод этилган.
Эслатиб ўтамиз, Хушдил Қурбонов ўз қариндоши Жўрахон Холов билан фуқаро Маҳмадризо Ражабов ишончига кирган ва унга 0,30 гектар ер ажратишни ваъда қилиб, эвазига 50 минг доллар талаб қилган.
Пулни қўлга киритгач, жавобгар шахс Сабзали Мажидовга мурожаат қилганини айтган. Ўзи эса бу пайтда Мажидовга қўнғироқ қилиб, ўзини президентнинг ўғли Сомони Эмомали деб таништирган ва Маҳмадризо Ражабовга ер ажратишни буюрган. Бироқ Мажидов Хушдил Қурбоновга ишонмаган ва ҳеч кимга ер ажратмаган.
Изоҳ (0)