Vazirlar Mahkamasi huzuridagi Davlat test markazi hamda O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi qarori bilan O‘zbekiston o‘rta maxsus, kasb-hunar ta’limi muassasalarida saralash test imtihonlarini o‘tkazish tartibi belgilangan. Unga ko‘ra, litsey va kasb-hunar kollejiga kirmoqchi bo‘lganlar uchun xuddi oliy o‘quv yurtiga hujjat topshiruvchilarga belgilangan singari test imtihonlari joriy qilingan. Bu haqda “7x7” gazetasi xabar bermoqda.
Imtihonlar biror kollej yoki litseyga o‘qishga kirish uchun bitiruvchilardan belgilangan miqdordan ziyod ariza kelib tushgan holatdagina Davlat test markazi tomonidan o‘tkaziladi. Imtihon kuni va fanlar majmuasi ta’lim muassasalariga qabul qilish Davlat komissiyasi tomonidan belgilanadi. Test sanasi abituriyentlarga 10 kun oldin ma’lum qilinadi.
Imtihon paytida umumta’lim maktablari o‘qituvchilari va ota-onalardan iborat 4-5 vakil kuzatuvchi sifatida ishtirok etadi. Ta’lim muassasalari qabul komissiyalari imtihonga ikki kun qolganda uning tartiblari bilan qaytadan tanishtirish uchun test o‘tkaziluvchi va “Abituriyent ruxsatnomasi” beriladigan binoda maslahat punktlarini tashkil etadi.
Agar abituriyent imtihonga mikrokalkulyator, lug‘at, jadval, kitob, uyali telefon, kompyuter, shpargalka yoki shunga o‘xshash narsalarni olib kirsa, sinov vaqti test materiallarini boshqalarga bersa yoki uzatsa, abituriyentlarga yordamlashsa, savollar kitobchasini yirtsa, u test tartibini buzgan hisoblanadi. Bunday hollarda dalolatnoma tuzilib, abituriyent testdan chetlashtiriladi.
Izoh (0)