Вазирлар Маҳкамаси ҳузуридаги Давлат тест маркази ҳамда Ўзбекистон Республикаси Олий ва ўрта махсус таълим вазирлигининг Ўрта махсус, касб-ҳунар таълими маркази қарори билан Ўзбекистон ўрта махсус, касб-ҳунар таълими муассасаларида саралаш тест имтиҳонларини ўтказиш тартиби белгиланган. Унга кўра, лицей ва касб-ҳунар коллежига кирмоқчи бўлганлар учун худди олий ўқув юртига ҳужжат топширувчиларга белгиланган сингари тест имтиҳонлари жорий қилинган. Бу ҳақда «7х7» газетаси хабар бермоқда.
Имтиҳонлар бирор коллеж ёки лицейга ўқишга кириш учун битирувчилардан белгиланган миқдордан зиёд ариза келиб тушган ҳолатдагина Давлат тест маркази томонидан ўтказилади. Имтиҳон куни ва фанлар мажмуаси таълим муассасаларига қабул қилиш Давлат комиссияси томонидан белгиланади. Тест санаси абитуриентларга 10 кун олдин маълум қилинади.
Имтиҳон пайтида умумтаълим мактаблари ўқитувчилари ва ота-оналардан иборат 4-5 вакил кузатувчи сифатида иштирок этади. Таълим муассасалари қабул комиссиялари имтиҳонга икки кун қолганда унинг тартиблари билан қайтадан таништириш учун тест ўтказилувчи ва «Абитуриент рухсатномаси» бериладиган бинода маслаҳат пунктларини ташкил этади.
Агар абитуриент имтиҳонга микрокалькулятор, луғат, жадвал, китоб, уяли телефон, компьютер, шпаргалка ёки шунга ўхшаш нарсаларни олиб кирса, синов вақти тест материалларини бошқаларга берса ёки узатса, абитуриентларга ёрдамлашса, саволлар китобчасини йиртса, у тест тартибини бузган ҳисобланади. Бундай ҳолларда далолатнома тузилиб, абитуриент тестдан четлаштирилади.
Изоҳ (0)