O‘rtayer dengizida cho‘kib ketgan kemaning kapitani shturvalni boshqarish vaqtida vino ichgan, qutqarib qolinganidan so‘ng esa o‘zini tanishtirish uchun o‘ylab topgan ismini bir necha bor esdan chiqarib qo‘ygan. Bu haqda Newskaz.ru xabar bermoqda.
“Undan o‘zini tanishtirishni so‘rashganida, u haqiqiy bo‘lmagan ismni aytgani ochiq ko‘rinib turgandi. Keyingi safar undan yana bir bor ismini so‘rashganida, u ismni eslolmay, bir necha soniya davomida o‘ylanib turdi”, - dedi kema halokatidan jabrlangan yo‘lovchilarga yordam ko‘rsatgan shifokorlardan biri Juzeppe Pomilla.
“Portugaliya savdo kemasi bilan to‘qnashuv arafasida shturvalni egallarkan, u mast holatda, gashish chekib turardi”, - dedi omon qolgan yo‘lovchilardan biri Italiyaning La Repubblica gazetasiga bergan intervyusida.
Avvalroq, kema halokatidan so‘ng Italiya politsiyasi ikki kishini – kema kapitani deb hisoblanayotgan 27 yoshli tunislik va uning katta yordamchisi – 25 yoshli suriyalikni hibsga olgan. Ularning har biri ikki yoki undan ortiq odamni o‘ldirish, kema halokati va noqonuniy muhojirlikka undashda ayblanmoqda.
Tunislik kapitan boshqaruvida bo‘lgan kema yakshanbaga o‘tar kechasi Liviya sohillaridan 60 dengiz mili uzoqlikda halokatga uchragan. Guvohlarning so‘zlariga ko‘ra, Yevropaga yetib olish maqsadida 900ga yaqin kishi chiqqan qayiq ag‘darilib, cho‘kib ketgan. Hozirgacha 24 kishi halok bo‘lgani va 28 nafari qutqarib qolingani ma’lum, qolganlar esa bedarak yo‘qolgan deb gumon qilinmoqda.
Izoh (0)