Ўртаер денгизида чўкиб кетган кеманинг капитани штурвални бошқариш вақтида вино ичган, қутқариб қолинганидан сўнг эса ўзини таништириш учун ўйлаб топган исмини бир неча бор эсдан чиқариб қўйган. Бу ҳақда Newskaz.ru хабар бермоқда.
«Ундан ўзини таништиришни сўрашганида, у ҳақиқий бўлмаган исмни айтгани очиқ кўриниб турганди. Кейинги сафар ундан яна бир бор исмини сўрашганида, у исмни эслолмай, бир неча сония давомида ўйланиб турди», - деди кема ҳалокатидан жабрланган йўловчиларга ёрдам кўрсатган шифокорлардан бири Жузеппе Помилла.
«Португалия савдо кемаси билан тўқнашув арафасида штурвални эгалларкан, у маст ҳолатда, гашиш чекиб турарди», - деди омон қолган йўловчилардан бири Италиянинг La Repubblica газетасига берган интервьюсида.
Аввалроқ, кема ҳалокатидан сўнг Италия полицияси икки кишини – кема капитани деб ҳисобланаётган 27 ёшли тунислик ва унинг катта ёрдамчиси – 25 ёшли сурияликни ҳибсга олган. Уларнинг ҳар бири икки ёки ундан ортиқ одамни ўлдириш, кема ҳалокати ва ноқонуний муҳожирликка ундашда айбланмоқда.
Тунислик капитан бошқарувида бўлган кема якшанбага ўтар кечаси Ливия соҳилларидан 60 денгиз мили узоқликда ҳалокатга учраган. Гувоҳларнинг сўзларига кўра, Европага етиб олиш мақсадида 900га яқин киши чиққан қайиқ ағдарилиб, чўкиб кетган. Ҳозиргача 24 киши ҳалок бўлгани ва 28 нафари қутқариб қолингани маълум, қолганлар эса бедарак йўқолган деб гумон қилинмоқда.
Изоҳ (0)