Орол денгизи муаммосини ҳал этишнинг кейинги йўлларини белгилаётган Ўзбекистон уни аввалги чегараларда қайта тиклаб бўлмаслигини яхши тушунади. Бу ҳақда Ўзбекистон қишлоқ ва сув хўжалиги вазири биринчи ўринбосари Шавкат Ҳамроев маълум қилди, дея хабар бермоқда Газета.uz.
«Жараён шу қадар илгарилаб кетганки, энди уни ортга қайтариш имкони йўқ», - деди у 12-17 апрель кунлари Жанубий Кореянинг Гёнджу шаҳрида бўлиб ўтаётган VII Жаҳон сув форуми доирасида ташкил этилган вазирлар давра суҳбатида.
«Оролнинг қуриши муаммоси ҳамда унинг атрофдаги табиий-экологик, ижтимоий-гуманитар вазиятга, генофонга, аҳоли саломатлигига таъсири тобора аянчли ва тузатиб бўлмас тус олаётгани йилдан йилга аниқ кўриниб бормоқда», - дея қайд этди Шавкат Ҳамроев.
«Бугун биз Орол денгизини қутқариш ҳақида эмас, балки минтақада истиқомат қилаётган одамларнинг ҳаётида тузатиб бўлмас ўзгаришларга сабаб бўладиган салбий тенденцияларни тўхтатиш ҳақида гапиряпмиз. Олдимиздаги вазифа – «сувни қутқариш эмас», аксинча, Оролбўйи реабилитацияси масалаларини ҳал этиш, аҳоли саломатлиги ва генофондини сақлаш, экотизимларни қайта тиклаш ва муҳофаза қилиш, шу ерда ва унга бевосита яқин ҳудудларда яшовчи 60 миллиондан ортиқ аҳолининг муносиб турмуши учун зарур шароитларни яратишдан иборат», - деди вазир ўринбосари.
Ҳамроев Орол инқирозини бартараф этишда кўмак кўрсатаётган БМТ агентликлари, халқаро молия институтлари ва донорларга миннатдорчилик билдирди. Айни вақтда унинг қайд этишича, Орол муаммоси билан боғлиқ ҳал этилиши керак бўлган вазифаларнинг кенг кўламда эканлиги «ушбу ҳудудда яна катта фожеалар содир бўлмаслиги учун миллий, минтақавий ва халқаро миқёсда ресурсларни бирлаштириш, ҳаракатларни янада самарали мувофиқлаштиришни талаб қилмоқда».
Изоҳ (0)