Эрон ўзига нисбатан жорий этилган санкциялар бекор қилинмагунича ўз ядровий дастури бўйича якуний битимни имзоламайди. Бу ҳақда, ТАССнинг хабар беришича, Эрон президенти Ҳасан Руҳоний маълум қилган.
«Барча санкциялар ўша куннинг ўзидаёқ бекор қилинмас экан, биз ҳеч қандай битимни имзоламаймиз. Биз ядровий масала бўйича музокараларга жалб этилган барча томонлар учун ўзаро манфаатли келишув бўлишини хоҳлаймиз», - дея қайд этди Руҳоний.
Айни вақтда, АҚШ санкцияларни босқичма-босқич бекор қилишни ёқлаб чиқмоқда. «АҚШ президенти маъмуриятининг санкцияларни биринчи кунданоқ, борича бекор қилиб юбориш тўғри эмаслигига ишончи комил», - деди Оқ уй матбуот котиби Жош Эрнест.
Аввалроқ, 2 апрель куни Швейцариянинг Лозанна шаҳрида Эрон ва унинг ядровий дастури юзасидан олиб борилган музокараларда иштирок этган «олтилик» мамлакатлари бир тўхтамга келишгани қайд этилганди.
Ўшанда, АҚШ маъмурияти вакили «Эрон ядровий дастурини тўхтатиш бўйича ҳаракатларни қанчалик тез амалга оширса, санкциялар ҳам шунчалик тез бекор бўлишини» таъкидлаганди.
Изоҳ (0)