Yevropa Chempionlar ligasida chorak finalning yana ikki ishtirokchisi ma’lum bo‘ldi. Markaziy o‘yin Londondagi “Stenford Bridj” stadionida bo‘lib o‘tdi. Unda “Chelsi” klubi Fransiyaning “Pari-Sen-Jermen” jamoasini qabul qildi, deb xabar bermoqda “Olamsport”.
Bu ikki jamoaning ilk o‘yinida 1:1 hisobi qayd etilgandi. Javob uchrashuvi parijliklar uchun omadsiz boshlandi. 31-daqiqada Oskarga ishlatilgan qo‘pollik uchun gollandiyalik hakam Born Kuypers Zlatan Ibragimovichga to‘g‘ridan-to‘g‘ri qizil kartochka ko‘rsatdi.
O‘yinning 81-daqiqasida Keyxill maydon egalarini hisobda oldinga olib chiqdi. Ko‘pchilik londonliklarning chorak finalga chiqqanini nishonlashga tushgan bir paytda David Luis Tibo Kurtua darvozasini ishg‘ol qildi. Shu tariqa g‘olibni aniqlash qo‘shimcha bo‘limlarga qoldi.
E’tiborlisi, qo‘shimcha bo‘limlarda ham xuddi shunday senariy takrorlandi. 96-daqiqada Eden Azar belgilangan penaltini golga aylantirdi. Yana ham “Chelsi”ni chorak finalga chiqdi deb turgan bir paytda Tiago Silva muvozanatni tikladi. Mehmonda kiritilgan gollar evaziga chorak final chiptasi “PSJ”ga nasib etdi.
“Chelsi” — “PSJ” 2:2 (dastlabki o‘yin - 1:1)
Gollar: Keyxill, 81, Azar, 96 (penalti) — David Luis, 86, Tiago Silva, 114
“Chelsi”: Kurtua — Ivanovich, Terri, Kexill, Aspilikueta — Matich (Zuma, 84), Ramires (Drogba, 91) — Oskar (Villian, 46), Fabregas, Azar — D. Kosta
PSJ: Sirigu — Markinos, Tiago Silva, David Luis, Maksvell — Matuidi (Rabio, 82), Motta, Verratti (Lavessi, 82) — Kavani, Ibragimovich, Pastore (Van der Vil, 118)
Ogohlantirishlar: Oskar, Ramires, D. Kosta — Motta, Matuidi, David Luis, Verratti
Chetlatish: Ibragimovich, 31
Izoh (0)