UEFA komissiyasi rahbari: “Bizning nizom bo‘yicha, Qrim Rossiyaning bir qismi emas”

UEFA Ijroiya qo‘mitasi vakili Frantishek Laurinets Qrimdagi futbol bilan bog‘liq vaziyatni izohladi, deb yozadi “Sports.ru”.

“UEFA — bu futbol organi, biz siyosiy masalalarni hal qila olmaymiz. Biroq biz o‘z nizomimizni hurmat qilamiz, unga ko‘ra esa Qrim — Rossiyaning bir qismi emas, chunki bu xalqaro hamjamiyat, BMT tomonidan tan olinmagan. Ya’ni, yuridik jihatdan u Ukrainaning bir qismidir”, — dedi u.

Laurinets mavjud muammolarni bartaraf etish uchun Qrimda maxsus status yaratib, uning ustidan nazoratni UEFAga topshirish niyatlari borligini aytdi. “Biroq biz Ukraina futbol federatsiyasini hurmat qilamiz va uning ruxsatisiz u yerda hech narsa qilmaymiz. Shu bilan birga, biz Qrimda futbolni saqlab qolishimiz kerak. Axir, Qrim — Yevropaning bir bo‘lagi”, — deya ta’kidladi u.