1-martga qadar O‘zbekiston bo‘ylab Vatanni madh etuvchi qo‘shiqlar yangraydi

“Nima qildik Vatan uchun?” shiori ostidagi Vatanni madh etuvchi qo‘shiqlar festivali O‘zbekiston Respublikasining barcha hududlarida 19-fevraldan 1-martga qadar tashkil etilmoqda, deb xabar beradi “Uz24.uz” Yoshlar madaniyat va san’at markazi axborot xizmatiga tayanib.

Festivalga shu yilning 14-fevral kuni Toshkent shahrida start berilgan edi. Yoshlar ijod saroyida o‘tkazilgan gala-konsertda 250 nafardan ziyod madaniyat va san’at vakillari, O‘zbekiston davlat san’at va madaniyat instituti, O‘zbekiston davlat konservatoriyasi va boshqa ta’lim muassalari talabalari ishtirok etdi. Festival, shuningdek, 19-fevral kuni Farg‘ona, 20-fevral kuni Andijon, 21-fevral kuni Namangan viloyatlarida o‘tkazildi.

Xabar berilganidek, festival fevral oyining so‘ngiga qadar respublikaning boshqa hududlarida ham davom etadi. Jumladan:

• Qoraqalpog‘iston Respublikasida 24-fevral kuni Berdaq nomidagi Qoraqalpoq davlat musiqali teatrida;
• Samarqand viloyatida 24-fevral kuni Samarqand san’at kolleji konsert zalida;
• Xorazm viloyatida 25-fevral kuni Ogahiy nomidagi musiqali drama teatrida;
• Navoiy viloyatida 25-fevral kuni “Farhod” madaniyat saroyida;
• Sirdaryo viloyatida 25-fevral kuni O.Xo‘jayev nomidagi musiqali drama teatrida;
• Buxoro viloyatida 26-fevral kuni Viloyat musiqali drama teatrida;
• Surxondaryo viloyatida 26-fevral kuni M.Uyg‘ur nomidagi musiqali drama teatrida;
• Jizzax viloyatida 26-fevral kuni Y.Rajabiy nomidagi musiqali drama teatrida;
• Qashqadaryo viloyatida 27-fevral kuni M.Toshmuhammedov nomidagi musiqali drama teatrida;
• Toshkent viloyatida 27-fevral kuni Olmaliq shahri “Metallurg” saroyida.

“Nima qildik Vatan uchun?” festivali doirasida yoshlarning intellektual salohiyatini aniqlash maqsadida viktorina tarzida interaktiv o‘yinlar tashkil etiladi. Viktorina Vatan, Mustaqillik, O‘zbekiston Respublikasi davlat ramzlari, tarixi, bugungi kuni, tinch va xotirjam farovon hayoti, bunyodkorlik ishlari, yoshlarga oid davlat siyosati, hududi, tabiatiga doir savollar asosida bo‘ladi. Viktorina interaktiv tarzda taniqli san’atkorlar tomonidan olib boriladi va unda festivalning barcha ishtirokchilari qatnashishi mumkin. Viktorina g‘oliblari Yoshlar madaniyat va san’at markazi tomonidan sovg‘alar bilan taqdirlanadi.