Toshkent shahar hokimi yoshlar o‘rtasida jinoyatchilik va huquqbuzarliklarning oldini olishga qaratilgan qo‘shimcha chora-tadbirlar to‘g‘risida qaror (pdf) qabul qildi, deya xabar bermoqda “Gazeta.uz”.
Hujjatda aytilishicha, Toshkent shahridagi yoshlar, ayniqsa voyaga yetmaganlar o‘rtasida nazoratsizlik va huquqbuzarliklar hamda jinoyatchilik oldi olinishi bo‘yicha barcha profilaktik tadbirlar amalga oshirib kelinayotganligiga qaramasdan, ushbu tadbirlar yetarli samara bermayapti.
“Tarbiyasi og‘ir, darslarga muntazam ravishda qatnashmaydigan bolalar ishtirokida alohida guruh va to‘dalar tashkil etish, ularning o‘zlari bilan o‘tkir tig‘li va inson hayotiga xavf yetkazishi mumkin bo‘lgan buyumlar (sovuq qurollar tarkibiga kiruvchi pichoq, xanjar, bigiz, kastet, bita, to‘qmoq), inson sog‘lig‘iga ta’sir etuvchi kimyoviy moddalar hamda elektr toki o‘tkazuvchi jihozlar va boshqa shu kabi har xil qurollarni yonlarida olib yurish holatlari uchramoqda”, — deyiladi qarorda.
Hujjatda keltirilgan statistik ma’lumotlarga muvofiq, 2014-yil yakunlariga ko‘ra sodir etilgan qotillik jinoyatlari 18,45 foizga oshgan bo‘lib, bu jinoyatlarning 19,6 foizi yoshlar, 2,4 foizi voyaga yetmaganlar tomonidan sodir etilgan.
Toshkent shahri hokimi qarori bilan poytaxtdagi umumta’lim va o‘rta maxsus ta’lim muassasalariga o‘tkir tig‘li va inson hayotiga xavf yetkazishi mumkin bo‘lgan buyumlar, kimyoviy moddalar hamda elektr toki o‘tkazuvchi jihozlar olib kirish taqiqlandi.
Hujjatga muvofiq, ta’lim muassasalari binosiga kirish-chiqish tartibi qoidalari ishlab chiqiladi.
Izoh (0)