Qozog‘istonning Akmola viloyatida yashovchi, uyidan O‘zbekiston fuqarosi bilan birga qochib ketgan o‘quvchi qiz Janubiy Qozog‘iston viloyatida mamlakatdan chiqib ketishga urinish vaqtida qo‘lga olindi. Bu haqda Akmola viloyati IIBga tayanib, “Novosti-Kazaxstan” agentligi xabar berdi.
Muassasa ma’lumotlariga ko‘ra, 27-yanvar kuni Otbosar tumani IITBga bir ayol murojaat qilib, 10-sinfda o‘qiydigan 16 yoshli qizi yo‘qolib qolganini ma’lum qilgan. Qidiruv natijasida qizning 1983-yilda tug‘ilgan O‘zbekiston fuqarosi bilan Janubiy Qozog‘iston viloyatiga jo‘nab ketgani aniqlangan. Juftlik qo‘shni davlat bilan chegaradosh tumanda qo‘lga olindi.
Aniqlanishicha, o‘quvchi qiz Qozog‘istondagi o‘zbekistonlik erkak bilan ijtimoiy tarmoq orqali tanishgan va u bilan O‘zbekistonga jo‘nab ketmoqchi bo‘lgan. Ayni paytda qiz Chimkentdagi adaptatsiya markaziga joylashtirildi.
Izoh (0)