Тошкент шаҳар ҳокими ёшлар ўртасида жиноятчилик ва ҳуқуқбузарликларнинг олдини олишга қаратилган қўшимча чора-тадбирлар тўғрисида қарор (pdf) қабул қилди, дея хабар бермоқда «Газета.uz».
Ҳужжатда айтилишича, Тошкент шаҳридаги ёшлар, айниқса вояга етмаганлар ўртасида назоратсизлик ва ҳуқуқбузарликлар ҳамда жиноятчилик олди олиниши бўйича барча профилактик тадбирлар амалга ошириб келинаётганлигига қарамасдан, ушбу тадбирлар етарли самара бермаяпти.
«Тарбияси оғир, дарсларга мунтазам равишда қатнашмайдиган болалар иштирокида алоҳида гуруҳ ва тўдалар ташкил этиш, уларнинг ўзлари билан ўткир тиғли ва инсон ҳаётига хавф етказиши мумкин бўлган буюмлар (совуқ қуроллар таркибига кирувчи пичоқ, ханжар, бигиз, кастет, бита, тўқмоқ), инсон соғлиғига таъсир этувчи кимёвий моддалар ҳамда электр токи ўтказувчи жиҳозлар ва бошқа шу каби ҳар хил қуролларни ёнларида олиб юриш ҳолатлари учрамоқда», — дейилади қарорда.
Ҳужжатда келтирилган статистик маълумотларга мувофиқ, 2014 йил якунларига кўра содир этилган қотиллик жиноятлари 18,45 фоизга ошган бўлиб, бу жиноятларнинг 19,6 фоизи ёшлар, 2,4 фоизи вояга етмаганлар томонидан содир этилган.
Тошкент шаҳри ҳокими қарори билан пойтахтдаги умумтаълим ва ўрта махсус таълим муассасаларига ўткир тиғли ва инсон ҳаётига хавф етказиши мумкин бўлган буюмлар, кимёвий моддалар ҳамда электр токи ўтказувчи жиҳозлар олиб кириш тақиқланди.
Ҳужжатга мувофиқ, таълим муассасалари биносига кириш-чиқиш тартиби қоидалари ишлаб чиқилади.
Изоҳ (0)