Dunyodagi birinchi tugmachasiz smartfon sotuvga chiqdi

Xitoyning unchalik taniqli bo‘lmagan Manta kompaniyasi Manta 7X deb nomlangan bironta ham tugmachaga ega bo‘lmagan smartfonni chiqardi, deya xabar bermoqda “Korrespondent.net”.

Manta 7X’ning tashqi ko‘rinishi Nexus smartfonlarini eslatadi. Klavishsiz smartfonni boshqarish juda oson: ekran pastida sensorli panel bo‘lib, u “Uyga” (Home) tugmachasi vazifasini bajaradi. Shunga o‘xshash panel yonbosh tomonda ham bo‘lib, uning yordamida ovoz balandligini boshqarish, telefonni o‘chirib-yoqish mumkin.

Manta 7X 5,5 dyuymli (1920×1080 pikselli) ekran, 4 yadroli Qualcomm Snapdragon 801 protsessori, 2 Gb tezkor, 32 Gb ichki xotira, 13 megapikselli asosiy kamera bilan jihozlangan.

Kompaniyadagilarning ishontirib aytishicha, smartfon suhbat rejimida 35 soat, kutish rejimida 654 soatgacha ishlashi mumkin.

Manta 7X Android 4.4 KitKat operatsion tizimida ishlaydi. Gadjet Xitoyda 652 dollardan sotila boshladi.