O‘zbekiston Madaniyat va sport ishlari vazirligi Respublika xalq ijodiyoti va madaniy-ma’rifiy ishlar ilmiy-metodik markazida Osiyo davlatlari xalq og‘zaki ijodidagi afsona, ertak va eposlar asosidagi ssenariylar xalqaro tanlovi g‘oliblarini taqdirlashga bag‘ishlangan tadbir bo‘lib o‘tdi. Bu haqda O‘zA xabar berdi.
O‘zbekistonlik yosh ijodkor Gulnoz Tojiboyevaning animatsion film uchun yozilgan “Jayxun va alanga” nomli ssenariysi tanlovda birinchi o‘ringa loyiq deb topildi. Halollik, mas’uliyat, mehr-oqibat singari yuksak fazilatlar tarannum etilgan mazkur asarda ona-tabiatni, uning bebaho ne’matlarini asrab-avaylash g‘oyasi ilgari surilgan.
O‘zbekiston Respublikasi Madaniyat va sport ishlari vazirligi, Koreya Respublikasi Madaniyat, sport va turizm vazirligi, Osiyo “Ertakchilik san’ati” xalqaro qo‘mitasi hamkorligida 2011-yildan buyon Osiyo davlatlarining xalq og‘zaki ijodidagi afsona, ertak va eposlar asosidagi ssenariylar bo‘yicha xalqaro tanlovi o‘tkazib kelinmoqda. Ushbu tanlov madaniy-ma’rifiy aloqalarni yanada mustahkamlash, xalq og‘zaki ijodiyoti namunalarini asrash, uni keng targ‘ib etishda alohida ahamiyat kasb etmoqda.
Bu yilgi tanlov iyun oyida e’lon qilinib, unga qadimiy doston, rivoyat, ertak va afsonalar asosida yaratiluvchi animatsion filmlar, teleserial, myuzikl, spektakl, badiiy film uchun Markaziy Osiyo davlatlari, Janubiy Koreya, rossiyalik mualliflardan 200 ga yaqin turli janrdagi ishlar taqdim etildi.
Izoh (0)