“Tojikiston temir yo‘llari” kompaniyasi Rossiyaning bir qator davlatlarga, jumladan Tojikistonga boradigan poyezdlar to‘xtatilishi to‘g‘risidagi xabardan hayratga tushganini ma’lum qildi, deb xabar bermoqda “Interfaks”.
Qayd etilishicha, Rossiya va Tojikiston o‘rtasidagi barcha yo‘lovchi poyezdlari qatnovi “Tojikiston temir yo‘llari” tomonidan amalga oshiriladi, “Rossiya temir yo‘llari” esa bunday faoliyat bilan 20 yildan ko‘proq vaqtdan buyon shug‘ullanmaydi.
Kompaniya Tojikiston fuqarolariga “Dushanbe−Moskva−Dushanbe” va “Xo‘jand−Moskva−Xo‘jand” yo‘nalishlarida haftada uch martadan poyezdlar yurishi davom etishini ma’lum qilgan.
Avvalroq, “Rossiya temir yo‘llari”ning sho‘basi “Federal yo‘lovchi kompaniyasi” 2014-yil 14-dekabrdan qator MDH davlatlariga amalga oshiradigan poyezdlari kamida bir yil muddatga to‘xtatilishini ma’lum qilgani xabar berilgan edi. Qayd etilishicha, “Rossiya temir yo‘llari”ning MDH davlatlarida faqat “Moskva−Kishinyov”, “Moskva−Brest”, “Tomsk−Leninogorsk”, “Chelyabinsk−Toshkent” va “Orenburg−Toshkent” yo‘nalishlardagi poyezdlari o‘z harakatini davom ettiradi.
Izoh (0)