CNN telekanali “Markaziy razvedka boshqarmasi ma’ruzasidagi 10 ta eng dahshatli qiynoqlar” reytingini tuzdi, deya xabar bermoqda “RIA Novosti”. Unda mahbuslarni qiynash va kamsitishning turli usullari sanab o‘tiladi.
AQSh senatining razvedka bo‘yicha qo‘mitasi 9-dekabr kuni MRBning terrorchilikda gumon qilinganlarni hibsga olish va so‘roq qilish bo‘yicha dasturi haqidagi 6 ming sahifali ma’ruzaning 500 sahifali qisqartirilgan versiyasini e’lon qildi.
CNN “antireyting”ida MRB agentlari tomonidan mahbuslarning sahnalashtirilgan qatli yetakchilik qildi. Keyingi o‘rinni “shafqatsiz istilo” egalladi, unda agentlar mahbusning kamerasiga bostirib kirib, kiyimlarini yechib, uzun yo‘lakdan sudrab o‘tgan va kaltaklagan.
Shuningdek, MRB qo‘lga olinganlarga nisbatan ularni 180 soatgacha uyqudan mahrum qilish, suvga cho‘ktirishni sahnalashtirish, oila a’zolarini zo‘rlash yoki o‘ldirish bilan tahdid qilish kabi qiynoqlarni qo‘llagan.
Yana bir mahbusni esa qop-qorong‘i xonada saqlab, unga bemaza yegulik berishgan, kameradagi haroratni pasaytirib, tun-u kun boshi ustida musiqa yangratishgan. Uni ikki kun davomida sutkasiga 22 soatdan qo‘lini kishanlab, osib qo‘yishgan.
CNN jurnalistlarini hayratga solgan narsalardan yana biri — bunday mahbuslarning barchasi ham real xavf keltirishi mumkin bo‘lmagan. Masalan, 2002-yilda qo‘lga olingan “terroristik fitna” ishtirokchilari boyitilgan uran asosida bomba yasamoqchi bo‘lgan. Biroq ular uranni boyitish haqida hech qanday ma’lumotga ega bo‘lmagan.
Izoh (0)