Sony Pictures Entertainment компаниясига уюштирилган киберҳужумни «Тинчлик соқчилари» хакерлар гуруҳи ўз бўйнига олди, дея хабар бермоқда «Газетa.ru». Ушбу ҳужум натижасида корпорациянинг ҳали эфирга чиқмаган фильмлари интернетда тарқалиб кетган эди.
Бундан ташқари, ушбу компания билан ҳамкорлик қилган Голливуд юлдузларининг шахсий маълумотлари ҳам очиқ манбаларда пайдо бўлди.
Ушбу ҳужум юзасидан олиб борилаётган тергов иши давомида Федерал қидирув бюроси 2013 йил мартида Жанубий Корея банклари ва телекомпанияларига ҳужум уюштиришда қўлланилган вирус қолдиқларини топган. Шу тариқа, «Тинчлик соқчилари» Шимолий Корея хакерлар гуруҳига алоқадор бўлиши мумкинлиги аниқланди.
Sony вакиллари сўзларига кўра, киберҳужум Ким Чен Иннинг қатл этилиши ҳақидаги «Интервью» фильми премьерасига бир ой қолганида содир бўлган. Шимолий Кореянинг киберҳужумга алоқадорлигини инкор қилиб ҳодисадан анча вақт ўтибгина мамлакат ҳукумати расмий баёнот берди. Эртаси куни эса Sony ходимлари таҳдидли мактуб олди. Унда Sony Pictures йўқ қилиб ташланиши ҳақида айтилади.
Айни пайтда ФҚБ киберҳужумга КХДР хакерларининг алоқадорлиги ҳақидаги версияни асосийлардан бири сифатида кўриб чиқмоқда.
Эслатиб ўтамиз, хакерлар ҳужумидан Сильвестр Сталлоне, режиссёр Жад Апатоу, австралиялик актриса Ребел Уилсон азият чеккан. Қайд этилишича, тармоққа юлдузларнинг ижтимоий ҳимоя рақамлари чиқарилган. Бундан ташқари, компаниянинг жами 47 мингдан ортиқ ҳозирги ва собиқ ходимларининг ижтимоий ҳимоя рақамлари интернетда тарқалиб кетган.
Ким Чен Иннинг қатл этилиши тўғрисидаги «Интервью» деб номланган фильм сюжетида АҚШ телевидениесида ишлайдиган икки мухбир Ким Чен Индан интервью олиш имконига эга бўлади. Улар Шимолий Кореяга кетиш сафаридан аввал махфий хизмат томонидан КХДР раҳбарини ўлдириш ҳақида буйруқ олади.
Аввалроқ КХДР амалдорлари ушбу фильмни танқид қилиб, агар фильм Америка экранларида кўрсатиладиган бўлса, улар АҚШнинг барча кинотеатрларни йўқ қилиш билан таҳдид қилган эди.
Изоҳ (0)