Qirg‘iziston parlamentida 23 yoshida o‘qishni bilmaydigan fuqarolar haqida gapirishdi

Qirg‘iziston parlamentining ijtimoiy siyosat qo‘mitasi majlisida “Bolalik instituti” jamoat fondi rahbari Nurjamol Jakubova 23 yoshida o‘qishni bilmaydigan qirg‘izistonliklar haqida gapirib berdi, deb yozadi “24.kg” axborot agentligi.

Uning so‘zlariga ko‘ra, har yili hech qayerda o‘qimaydigan va ishlashga majbur bo‘lgan 50 nafar bolalar aniqlanadi. “Bunday voyaga yetmaganlar jami 7 ming nafarni tashkil qiladi. Hattoki 23 yoshida o‘qishni bilmaydiganlari ham bor. Bunday fuqarolar milliy xavfsizlik uchun tahlikadir”, — dedi Nurjamol Jakubova.

U bunday holatlarga kechki maktablarda xizmatlar tijoriy asosda taqdim etilishini ham sabablardan biri sifatida keltirdi.

Munozara yakunida hukumatga bunday maktablarga bo‘lgan zaruratni muhokama va tahlil qilish vazifasini yuklashga kelishildi.