Toshkent shahridagi “O‘zekspomarkaz”da “O‘zbekiston matbuoti” IV Milliy ko‘rgazmasi bo‘lib o‘tdi. Bu haqda O‘zbekiston Milliy axborot agentligi xabar bermoqda.
O‘zbekiston matbuot va axborot agentligi tomonidan O‘zbekiston Respublikasi Oliy Majlisi Qonunchilik palatasi va O‘zbekiston Respublikasi Vazirlar Mahkamasi hamkorligida tashkil etilgan ushbu ko‘rgazmada O‘zbekistonning turli hududlaridagi nashriyotlar, bosma OAV o‘z mahsulotlari bilan ishtirok etdi.
Ko‘rgazmaning ochilishida O‘zbekiston matbuot va axborot agentligi bosh direktori O. Yunusov va boshqalar Prezident Islom Karimov rahnamoligida fuqarolarning so‘z va axborot erkinligiga doir huquq va manfaatlarini ta’minlash, yuksak ma’naviyatli avlodni voyaga yetkazish, yoshlarni turli axborot xurujlaridan ishonchli himoyalash masalalariga ustuvor vazifa sifatida e’tibor qaratilayotganini ta’kidladi.
O‘zbekistonda OAV, nashriyot va matbaa korxonalariga berilgan soliq imtiyozlari natijasida O‘zbekiston matbuot va axborot agentligi tizimidagi korxonalarda jami 7,5 million dollar hajmidagi modernizatsiya ishlari amalga oshirildi.
“O‘zbekiston matbuoti” IV Milliy ko‘rgazmasida O‘zbekistonning yetakchi davriy bosma nashrlari, axborot agentliklari va nashriyotlar ishtirok etib, matbuot va axborot sohasida erishilgan yutuqlarni namoyish etmoqda. Bu yilgi ko‘rgazmada markaziy hamda hududlardagi yoshlar davriy nashrlariga alohida e’tibor qaratilmoqda.
Ko‘rgazmada “Sog‘lom bola yili” Davlat dasturi ijrosi doirasida navqiron avlod ong-u shuurini turli ma’naviy tahdidlar, “ommaviy madaniyat”ning salbiy ta’siridan ishonchli himoyalashga qaratilgan chora-tadbirlar, jumladan, O‘zbekiston nashriyotlari, bosma OAVda mazkur yo‘nalishda e’lon qilinayotgan materiallar, bosma manbalar bilan ishtirokchilar atroflicha tanishtirildi.
“Nashriyotimiz joriy yilda ‘Kamolot’ yoshlar ijtimoiy harakati bilan hamkorlikda ‘Javondagi yuz javohir’ rukni ostida o‘zbek va jahon adiblarining eng sara asarlarini kitob holida chop etib, o‘quvchilarga taqdim etdi, — dedi “Yangi asr avlodi” nashriyot-matbaa markazi bosh muharriri Ma’mura Qutliyeva. — Shu bilan birga, bolalarning ijodiy-intellektual saviyasini oshirish, chet tillarni o‘rganishga oid ko‘plab ma’rifiy yo‘nalishlardagi kitob va qo‘llanmalar, lug‘atlar yosh kitobxonlar uchun o‘ziga xos tuhfa bo‘ldi”.
Ko‘rgazma doirasida “Sog‘lom bola yili” Davlat dasturiga asosan nashr etilgan bolalar adabiyoti ko‘rgazmasi tashkil etildi. Unda 20 dan ziyod nashriyot va matbaa korxonalari o‘z mahsulotlari bilan ishtirok etdi.
Izoh (0)