Pxenyanga amerikalik fuqarolarni hibsdan ozod qilishga erishish maqsadida kelgan AQSh milliy razvedkasi direktori Jeyms Klepper KXDR hukumatiga AQSh prezidenti Barak Obama tomonidan Kim Chen In uchun yozilgan maktubni topshirdi. Bu haqda CNN telekompaniyasiga tayanib, “TASS” xabar bermoqda.
Xabarga ko‘ra, xat qisqa va lo‘nda bo‘lgan. Unda Klepper Obamaning “shaxsiy elchisi” ekanligi ham aytilgan.
CNN Amerika ma’muriyatiga tayanib ta’kidlashicha, Klepper Kim Chen In bilan yuzma-yuz uchrashmagan. Uning Shimoliy Koreya hukumati a’zolari bilan muzokaralari faqat AQSh fuqarolari Kennet Bey va Metyu Tod Millerni Amerikaga qaytarish bilan bog‘liq bo‘lib, KXDR yadro dasturiga tegishli bo‘lmagan.
Telekompaniya ma’lumotlariga ko‘ra, KXDR hukumati kutilmaganda AQSh hukumati bilan bog‘lanib, Bey va Millerni ozod etish bo‘yicha masalani muhokama qilish uchun ma’muriyat a’zolaridan birini yuborishni so‘ragach, Klepper Pxenyanga tashrif buyurgan.
Izoh (0)