“Sog‘lom bola yili” davlat dasturining 94-bandiga muvofiq, Xalq ta’limi vazirligi tomonidan ilk marotaba ota-onalar uchun bolalarni maktabga tayyorlash bo‘yicha beshta kitob yaratildi. Bu haqda O‘zbekiston Respublikasi Xalq ta’limi vazirligi axborot xizmati xabar bermoqda.
Hozirda 436 130 nafar oilaga bepul tarqatilayotgan mazkur qo‘llanmalar farzandi maktabgacha ta’lim tizimiga qamrab olinmagan ota-onalar uchun mo‘ljallangan bo‘lib, ular yordamida bolaning dunyoqarashi, mantiqiy fikrlashi va nutqi rivojlantiriladi, bola shaxsiy gigiyena qoidalari bilan tanishtiriladi.
Qo‘llanmalar “Bolajon” tayanch dasturi asosida rangli-bezakli shaklda tayyorlangan va Maktabgacha ta’lim muassasalari xodimlarini qayta tayyorlash va malakasini oshirish Respublika o‘quv-metodika markazi qoshidagi ilmiy kengash tomonidan tasdiqlangan.
Qo‘llanmalar beshta kitobdan iborat bo‘lib, jami 2,5 million nusxa (har bir kitob 446 ming nusxadan) chop etildi. Bular:- “Nutq o‘stirish, o‘qish va savodga tayyorgarlik”:
- “Matematik tasavvurlarni shakllantirish”:
- “She’riy asarlar to‘plami”:
- “Nasriy asarlar to‘plami”:
- “Sog‘ tanda – sog‘lom aql”:
Joylarda tuman (shahar) xalq ta’limi muassasalari faoliyatini metodik ta’minlash va tashkil etish bo‘limlarining maktabgacha ta’lim uslubchilari, “Mahalla” xayriya jamoat fondi va boshqa hamkor tashkilot hamda idoralar vakillari bilan birgalikda maktabgacha ta’limga qamrab olinmagan 5—7 yoshli farzandli oilalar ro‘yxati shakllantirilib, hozirda ularga qo‘llanmalar maktab kutubxonalari orqali bepul tarqatilmoqda.
Ota-onalar qo‘llanmadan yil davomida foydalangan holda o‘z farzandini maktab ta’limiga sifatli tayyorlaydi.
Ma’lumot uchun, bugungi kunda respublika bo‘yicha jami 4950 ta maktabgacha ta’lim muassasasiga 581 539 nafar bola qamrab olingan.
Izoh (0)