Myanma davlatining Yangon shahrida 19 yoshgacha bo‘lgan yoshlar o‘rtasidagi Osiyo chempionati chorak final uchrashuvlarining barchasi o‘z nihoyasiga yetdi, deb xabar bermoqda Uff.uz.

Ravshan Haydarov boshchiligidagi O‘zbekiston terma jamoasi bugun Tailand termasiga qarshi maydonga tushib, 1:2 hisobidagi g‘alabani tantana qildi.

Mazkur g‘alaba O‘zbekiston vakillariga musobaqaning yarim finali eshiklarini ochish bilan birga kelasi yili Yangi Zelandiya davlatida o‘tadigan Jahon chempionatiga ham yo‘llanmani taqdim etdi.

O‘zbekiston tarkibida ikki golni ham Zabihullo O‘rinboyev kiritdi. Tailandning bitta javob goliga 47-daqiqada Samfaodi mualliflik qildi. O‘zbekiston bundan yirikroq hisobda g‘alaba qozonishi mumkin edi, ammo so‘nggi zarbalarda aniqlik yetishmadi.

Lekin O‘zbekiston futbolchilari muhim natijani ushlab qola oldi.

Endi O‘zbekiston Osiyo chempionatining yarim finalida KXDR yoshlariga qarshi to‘p suradi.

AFC U-19, chorak final

Tailand — O‘zbekiston: 1:2

Gollar: Samfaodi (47) — Zabihullo O‘rinboyev (6), Zabihullo O‘rinboyev (22).

Tailand: Songsanchang Rattanai, Safaodi Chenrop, Kannu Sittichok, Virachat Chaovat, Sukchuai Atxavit, Fonkam Nopfon, Jantum Prasid, Changom Santfarp, Liach Shinnafat, Pinagatafo Suporn, Anmvech Voravut.

O‘zbekiston: Dilshod Hamroyev, Ibrohim Abdullayev, Akromjon Komilov, Doston Tursunov, Javohir Sohibov, Asliddin Abdiyev, Otabek Shukurov, Jamshid Boltaboyev, Xurshid G‘iyosov, Zabihullo O‘rinboyev, Eldor Shomurodov.