O‘zbekiston Respublikasi Prezidenti huzuridagi Davlat boshqaruvi akademiyasining Prezident huzuridagi Davlat va jamiyat qurilishi akademiyasi qoshidagi Oliy biznes maktabi Vazirlar Mahkamasi huzuridagi Oliy biznes maktabi (OBM)ga aylantirildi. Bu haqda hukumat qaroriga (pdf) tayanib Gazeta.uz xabar berdi.
OBM biznesni boshqarish va korporativ boshqaruv sohasida xo‘jalik boshqaruvi organlari, kichik biznes va xususiy tadbirkorlik subyektlari uchun yuqori malakali mutaxassislar tayyorlash bo‘yicha mustaqil oliy ta’lim muassasasi bo‘ladi.
OBM “biznesni boshqarish” (Master of Business Administration — MBA) mutaxassisligi bo‘yicha ikki yillik magistratura ta’lim dasturi bo‘yicha o‘qitishning kunduzgi shakli bo‘yicha o‘qish yakuni bo‘yicha magistr darajasini va davlat namunasidagi diplom bergan holda boshqaruv kadrlarni tayyorlaydi.
Ushbu maktab magistraturasiga ochiq tanlov asosida oliy ma’lumotga (diplomli mutaxassis, bakalavr) va oliy ta’lim muassasasini bitirgandan keyin kamida uch yillik ish stajiga ega va 40 yoshgacha bo‘lgan O‘zbekiston Respublikasi fuqarolari orasidan test sinovlari o‘tkazish yo‘li bilan xo‘jalik boshqaruvi organlari, kichik biznes va xususiy tadbirkorlik korxonalarining rahbar xodimlari va mutaxassislari qabul qilinadi.
OBMda xo‘jalik boshqaruvi organlari, korxonalar, tashkilotlar, jumladan kichik biznes subyektlarining magistr darajasiga ega bo‘lgan yoki diplomli mutaxassis hisoblangan rahbar xodimlarini qayta tayyorlash va ularning malakasini oshirish “rahbar xodimlar uchun biznesni boshqarish” (Executive MBA) ixtisosligi bo‘yicha maxsus ta’lim dasturi bo‘yicha amalga oshiriladi.
O‘qish davrida OBM tinglovchilarining egallab turgan ish o‘rinlari saqlab qolinadi hamda ular belgilangan tartibda oliy ta’lim muassasalari talabalari uchun amaldagi bazaviy stipendiya to‘lovlari bilan ta’minlanadi.
OBMga “biznesni boshqarish” (MBA) mutaxassisligi bo‘yicha magistrlar tayyorlash yillik qabul kvotasi soni 75 kishi deb belgilandi.
2011—2014-yillarda OBMda o‘qishni muvaffaqiyatli tugatgan bitiruvchilarga ushbu qaror bilan belgilangan namunadagi diplom beriladi.
Izoh (0)