Jeneva universiteti fiziklari fotonning kvant holatini 25 kilometr masofaga teleportatsiya (ma’lum bir obyektning xususiyatlarini muayyan masofadagi boshqa bir obyektga ko‘chirib o‘tkazish) qildi. Olimlar tadqiqot natijalarini Nature Photonics jurnalida chop etdi, deb xabar bermoqda AlphaGalileo.
Tadqiqot jarayonida olimlar ikki chalkash fotonni optik tola bo‘yicha 25 kilometr masofaga ko‘chirgan. Bunda zarralardan biri (ikkinchisi) kristallda bo‘lgan.
Shundan so‘ng, fiziklar uchinchi foton bilan ta’sir etish orqali birinchisining kvant holatini o‘zgartirdi. Natijada kristalldagi ikkinchi zarra ham o‘zgardi.
Tadqiqot davomida olimlar fotonlarning bir-biridan 25 kilometr uzoqlikda joylashganiga qaramay, birining holati o‘zgarsa, ikkinchisiga ham ta’sir qilishini kuzatdi.
Bundan avval fotonlarni teleportatsiya qilish tadqiqoti 10 yil muqaddam o‘tkazilgan, biroq unda fotonlar bir-biridan olti kilometr masofada joylashgan edi.
Teleportatsiya optik tolada havoga nisbatan qiyin kechadi. Bu fotonlarning shisha bilan o‘zaro ta’siriga bog‘liq bo‘lib, bunda ular o‘zidagi dastlabki ma’lumotning anchagina qismini yo‘qotadi.
O‘z o‘lchamlarida katta aniqlikni kuzatgan olimlarning fikricha, bu tadqiqot chalkash fotonlarni kvant kriptografiyasida ishlatishda taraqqiyotga olib kelishi mumkin.
Izoh (0)