Incheon — 2014’da tennis bo‘yicha O‘zbekiston erkaklar terma jamoasi bronza medalga sazovor bo‘ldi

Tennis bo‘yicha O‘zbekiston erkaklar terma jamoasi Osiyo o‘yinlarining bronza medalini qo‘lga kiritdi, deb xabar bermoqda Stadion.uz.

Istomin boshchiligidagi O‘zbekiston terma jamoasi nimchorak finalda Saudiya Arabistonini 3:0, chorak finalda kuchli hisoblangan Janubiy Koreyani 2:1 hisobida mag‘lub etgandi. Bugun esa O‘zbekiston yarim finalda Qozog‘istonga qarshi murosasiz bahs olib bordi.

Dastlabki kortga Farrux Do‘stov va Aleksandr Nedovesov chiqdi. Unda qozog‘istonlik tennischi ikki setda g‘alaba qozondi (6:3, 6:4).

Ikkinchi o‘yinda esa Denis Istomin Mixail Kukushkinni uch setda mag‘lubiyatga uchratdi — 4:6, 6:3, 6:4.

Juftliklar o‘rtasidagi bahs ham uch set davom etdi. Birinchi set tay-brekkacha davom etdi va unda Istomin/Do‘stov 7:4 hisobi bilan zafar quchdi. Ikkinchi setda esa 7:5 hisobida Golubev/Nedovesov juftligi g‘alaba qozondi. Uchinchi setning boshida boy berilgan geym O‘zbekiston vakillariga qimmatga tushdi — 4:6.

Shu tariqa, Qozog‘iston finalga chiqqan bo‘lsa, O‘zbekiston delegatsiyasi hisobida bronza medallar soni beshtaga yetdi.