Qarshidagi ikkita istirohat bog‘i 2,7 mlrd so‘mga tubdan rekonstruksiya qilindi

Qarshi shahrida Alisher Navoiy nomidagi madaniyat va istirohat bog‘i va bolalar madaniyat bog‘i kapital rekonstruksiyadan so‘ng ochildi, deya xabar bermoqda “Pravda Vostoka”.

Ushbu bog‘lar 2011—2015-yillar uchun madaniyat va istirohat bog‘larining moddiy-texnik bazasini mustahkamlash va ularning faoliyatini yanada takomillashtirish bo‘yicha chora-tadbirlar dasturi doirasida qisqa vaqt ichida tubdan rekonstruksiya qilindi. Endi ular madaniy-ko‘ngilochar va sport-sog‘lomlashtirish majmualariga aylantirildi, deyiladi xabarda.

Shahardagi ikkita bog‘da olib borilgan qurilish, ta’mirlash, obodonlashtirish va jihozlash ishlari 2,735 milliard so‘mga tushdi. Ushbu mablag‘ hisobidan bolalar madaniyat bog‘i hududida 12 ta yangi attraksion o‘rnatildi, ikkita yozgi qahvaxona, fotosalon va mini-futbol stadioni qurildi.

Alisher Navoiy nomli istirohat bog‘ida ham attraksionlar soni deyarli ikki barobar ko‘paytirildi.